السلام عليكم وَ رحمه الله وبركاته ♥
.
.
تدوينتي اليوم راح تكون عن بعض الأشكال لتنسيق الورد وكيف العناية بها مع طريقة تنسيق بسيطة
دائما لو ركزنا في بعض تنسيقات الورد نلاحظ ان بعضها ينحاز لشكل معين
بحط صور توضح وش اقصد :
معادلات رياضيه ؟ هههههه تشبه للزوايا الرياضية بس بمفهوم رقيق جدا
كل حرف = نوع ورد
وطبعا المحصلة النهائية تنسيق بنفس الشكل المختار مثل كذا تقريبا :
انا دخلت كورس لتنسيق الورد قبل 3 اسابيع تقريبا وحدة من المتدربات معنا سألت المدربة
هل هناك في أساسيات تعتمدينها اذا جيتي تنسقين الورد ؟ جاوبت وبكل صراحة لا تنسق
على الي يعجبها حتى عينها ترضى على الشكل النهائي .
اتفق مع كلامها بشكل بسيط لأن لها خبرة طويلة في تنسيق الورد للحفلات وما شابهها فعشان كذا هي انسانه متمرسة وفوق كذا الذوق يختلف من شخص لشخص
كيف ننمي مهارة اختيار أنواع الورد الي تتماشى مع بعض والتنسيقات الجميلة ؟
بالنسبة لي كان افضل خيار حبيب الشعب pinterest افتحه وابحث عن التنسيقات واتأملها
فتحت فولدر جمعت فيه التنسيقات الي تعجبني ومع كثر مالعين تشاهد صدقوني راح تتمرس
في كيفية انتقاء الورد وتنسيقه .
نجي الحين للطريقة الي اعتمدها في العناية بالورد ؟
قبل كل شيء لازم نعرف ان الورد يحتاج عناية خاصة ،راح أوضح لكم كيف في خطوات بسيطة :
- نقص مقدار انش تقريبا لطرف الوردة قبل مانحطها في الوعاء الي مجهزينها لها وهالخطوة نكررها كل مانجي نغير الموية .
- نغير الموية كل يومين الى ثلاثة أيام تقريبا .
- مهم جدا نستخدم الغذاء الخاص بالورد، لاحظت هنا بأمريكا لما اشتري ورد يكون مرفق معها الغذاء الخاص فيها فمريحين الموضوع على العكس في الرياض ماكنت احصل شيء يجي معها لما اشتري مدري اذا تغير الوضع والا بس أتوقع تحصلونه في ساكو او عند المشاتل .
- مايحتاج نعرضها للشمس بشكل مباشر ونبعدها قد مانقدر عن تيار الهواء الحار .
- نبعدها عن الخضروات والفواكه .
- اخر نقطة مهم جدا لما خلاص بنشيل الورد من الوعاء نعقمه كويس بالمويه الحارة والصابون لأن طبيعي يكون فيه بكتيريا ومانبي هالبكتيريا تأثر على الورد الفريش الجديد .
الحين بأحط لكم تنسيق بسيط سويته من فترة طبعا انا مب انسانه متمرسة في عالم تنسيق الورد
بس يستهوني جدا وأحاول احاكي بعض التنسيقات الي اشوفها في الصور .
اخترت هالنوعين وبعدين جبت التيب ولزقته بهالشكل الي ظاهر لكم في هالصورة ،
وبعدها بديت احط الورد بالشكل الي يعجبني ..
وهذا الشكل النهائي :
يوم كنت برا عشان اصور الجو بارد فكانت النتيجة لما دخلت الورد كذا
وبكذا انتهت تدوينتي هنا ،
اراكم لاحقا يا اصدقاء 
No comments:
Post a Comment