تفاصيل و شوية صور في مرحلة بداية الأكل لطفلي \ Baby food ♥

السلام عليكم وَ رحمه الله وبركاته 

اليوم حابه أتكلم عن الأمومة شوي وخصوصا فقرة بداية الأكل مع الطفل

حاولت  الخص الأشياء الأساسية وان شاءالله اني مانسيت شيء ♥

  

اكثر ما كان يؤرقني لما وصل فيصل ٦ شهور هي مسألة الأكل ايش يصلح له وايش لا !

راح اوثق هنا تجربتي لعلها تكون مرجع لأي وحدة محتارة بخيارات الأكل للبيبي

 * بعض الصور الي راح اعرضها مني وبعضها راح تكون من النت .

طبعا لايخفينا السؤال الدائم الذي يراود الأمهات متى ابدا الأكل لطفلي ؟

والمعروف ان الطفل متاح له انه يأكل من عمر ٤ شهور لكن الأفضل انه من ٦ شهور

حسب ما قرأت عموما هناك بعض الحالات تأكد ان الطفل عنده قابلية للأكل مثل :

- قدرته على الجلوس مع ثبات رأسه .

- يظهر اهتمامه بالأكل .

- قدرته على مضغ الطعام .

بعد ما تأكدنا وصرنا جاهزين الخطوة الي بعدها نشوف ايش الأشياء الي ابعد عنها !

اول شيء ( العسل ) ضروري الإبتعاد عنه لحد مايكمل الطفل سنة تقريبا

وذلك بسبب ان العسل قد يحتوي على جراثيم تؤدي للتسمم الغذائي .

وقريت دراسة أمريكية تتكلم عن هالموضوع و هو انه ( من 145 حالة من التسمم المبلغ

عنها سنويا في الولايات المتحدة، حوالي 94 حالة (65٪) هي تسمم الرضع) *

الشيء الثاني : لمن يستخدم الحليب الصناعي البعض يستغني عنه ويستبدله بحليب

الأبقار وهذا خطأ لأن مهما كان فائدة الصناعي اكثر ويكون مدعم بالأشياء الي

يحتاجه الطفل في هالعمر .

.

.

حاليا جاء وقت ايش الأشياء المفيدة وتصلح ابدا فيها ،

في البداية يفضل نجرب كل نوع خضار لحاله لمدة ثلاث أيام تقريبا عشان

لو لا سمح الله يكون عنده تحسس معين نكتشفه من بدري وبعد كذا نقدر ندمج اكثر

من نوع مع بعض .

يفضل نبدا بالخضار قبل الفواكة عشان مايتعود على الأشياء الحاليه وبعدها

يستنكر الخضار ويصير صعب تقبلها !

الي في الصورة :

الخضار : ( كوسه + قرع + بنجر +جزر + سبانخ + بطاطا حلوة )

الفواكه : ( تفاح + كمثرى )

* اخر الموضوع راح يكون فيه جدول بالأكل لكل عمر .

.

.

الشوفان من الأشياء المفيدة جدا سواء نستخدمها مع الفواكه او مثل هالطريقة الي كنت استخدمها

لفيصل كان يحبها بشكل ، مرة احط تمر ومرة تين .

طريقته :

شوفان وتمر اطحن الشوفان لحد مايكون ناعم

بعد ما اطحنه اخذ المقدار الي احتاجه واضيف عليه مويه واتحكم بثقله حسب مايناسبني واحطه على النار

وفي نفس الوقت اكون حطيت التمر في ربع كاس مويه مغلي لحد ٥ دقايق تقريبا وبعدين اطحنه بالخلاط

واضيفه على الشوفان واخليه شويات على النار .

الزبادي ،  يفضل البعد كل البعد عن الزبادي بالنكهات

واذا تبين نكهات مافيه مثل الأشياء الطبيعية .

بالنسبة  للأرز والمكرونة طبعا الأسمر منهم قيمته الغذائية عالية

الأرز من عمر ٦ شهور لكن المكرونه يفضل من عمر٨ شهور

الي في الصورة وجبة لفيصل يوم كان عمره حول ٩ شهور تقريبا  : مكرونه مع دجاج وبازلا

طبعا لما يكون الطفل في الشهر الثامن يفضل ننتقل للمرحلة الثانية من تقديم الأكل له وهي :

نبدا نخفف من الأكل المهروس الى الأكل الي يحتاج مضغ اكثر 
يعني نحاول نخلي قطع في الخضار طرية بس مب لدرجة يسهل بلعها على طول
 وطبعا هنا يجي دور التمثيل قدامه تمثلين انك جالسه تمضغين

عشان يفهم الفكرة ههههه

.

.

هنا في الصورة جمعت الأشياء الي تصلح للطفل مع توضيح العمر المناسب 

ولو تلاحظون جهة البروتين فيه شيء اسمه ( التوفو ) لاحظت الأجانب معتمدينه بشكل اساسي

 في بداية الأكل للبيبي .

وحسب ما قرأت ان التوفو غني بالبروتينات والاحماض الأمينية الأساسية، 

وهو أيضاً مصدر جيد للحديد وفيتامين ب ، والكالسيوم .

للأمانه انا ماجربته لأني ماكنت اعرفه فحطيته هنا لعل غيري ان شاءالله يستفيد ♥

وبكذا انتهى هالموضوع وان شاءالله وقت ثاني راح اتكلم 

عن طرق تخزين الأكل للطفل ، والسناك المناسب في الطلعات . 

وياليت لو احد يستفيد يذكرني بدعوة في ظهر الغيب ♥

اراكم لاحقا يا اصدقاء .